Veit andinn af efninu?
Ragnheiður Gestsdóttir, Sigrún Hrólfsdóttir, Sindri Leifsson
16.01–28.02.2021

Það sem er búið að gerast, hverfur ekki. Flestir ferlar daglegs lífs, náttúrulegir og manngerðir, varðveita einhvers konar efni — Það gufar kannski upp en fellur aftur til jarðar í formi rigningar, sem dæmi. Það sama á við um mannkynssöguna, hún hrannast upp og leggur grunn að þeirri framtíð sem sækir að — en aðeins ef búið er að skrásetja hana, mæla og spegla. Annars gerist nefnilega ekkert í alvörunni. 
 
Veit andinn af efninu? er könnunarferð um þau regluverk sem mannkynið hefur skapað sér í gegnum tíðina. Félagsleg, efnahagsleg, pólitísk og menningarleg kerfi vestræns samfélags sem móta og ákvarða veruleikann sem við lifum í og litast reyndar líka af ýmis konar togkröftum náttúrunnar sem erta skyntaugarnar. 
 
Verkin á sýningunni endurspegla viðleitni listamannanna til að greina og gera sýnilegan áhrifamáttinn sem kerfin byggja á og manneskjan á svo erfitt með að standast. Listamennirnir leita ekki eiginlegra svara, heldur reyna að koma auga á mismunandi leiðir til að skilja. Þannig verða verkin hvatar eða brot af frásögn sem afhjúpar það viðtekna og við getum sjálf raðað saman og bætt við að vild.

Sýningartexti

Útskriftarsýning meistaranema í myndlist 2020
Listaháskóli Íslands

Listamenn: Guðrún Sigurðardóttir, Hugo Llanes, Lukas Bury, Mari Bø, María Sjöfn, Nína Óskarsdóttir, Sabine Fischer, Sísí Ingólfsdóttir

Sýningarstjórn Hanna Styrmisdóttir

Útskriftarsýning meistaranema í myndlist frá Listaháskóla Íslands árið 2020 undir yfirskriftinni Forðabúr – Supply opnar í Nýlistasafninu miðvikudaginn 28. október. Áætlaður opnunardagur var 10. október síðastliðinn en frestaðist vegna almennra lokana í samfélaginu.

Sýnendur eru Guðrún Sigurðardóttir, Hugo Llanes, Lukas Bury, Mari Bø, María Sjöfn, Nína Óskarsdóttir, Sabine Fischer og Sísí Ingólfsdóttir. Sýningin sem stendur til sunnudagsins 22. nóvember er jafnframt lokaviðburður Útskriftarhátíðar Listaháskóla Íslands 2020 sem teygir sig að þessu sinni yfir sex mánuði.

Í Forðabúri er sögð saga sem hægt er að nálgast frá mörgum sjónarhornum. Hún gæti hafist á fögrum sunnudagsmorgni í Varsjá fyrir sjötíu og sjö árum. Hún gæti líka hafist við Gunnuhver á Reykjanesi, í fyrrum Austur-Þýskalandi, á súraldinbúgarði í Mexíkó, IKEA verslun einhvers staðar í heiminum, eða í miðborg Reykjavíkur; fyrir þrjú hundruð árum, fjörtíu árum, eða á þessari stundu. E.t.v. rekjum við okkur í gegnum þráð í hekluðu móti um afsteypur, að síma og gervinöglum; eða við ferðumst frá örhreyfingum líkamans og jarðarinnar að því að snerta og móta, hlut, heimili, sögu, verk.

Í einni sýningu átta listamanna liggja margir þræðir og enn fleiri sögur. Hvernig sem við, sem stöndum að henni, staðsetjum okkur og sjónarhorn okkar, eru það áhorfendur sem að endingu setja hana saman.

Í Forðabúri – Supply er beint sjónum að þeim forða þekkingar, hæfni og aðferða sem byggist upp og endurnýjast í sífellu í rannsókn og nýsköpun listamanna; með æfingu, endurtekningu, ígrundun, mistökum og endurskoðun; samvinnu og samhæfingu við aðra. Forðabúrið er bæði einstaklingsbundið og sameiginlegt, samruni seiglu og sköpunar.

Sýnendur nota í verkum sínum blandaða tækni og miðlun, svo sem málverk, bókverk, þrívíddarprentun, keramík og hljóðmyndir; síma, kaðla og tjöru; ljósritun, kínetík og kóreógrafíu; vídeó, myndvinnslu, hekl, kappmellingu og afsteypugerð; trésmíði, texta, gervineglur, Ikea hillur, trjágreinar og flögg.

HJARTSLÁTTUR
yfirlitssýning Ástu Ólafsdóttur

22.08.–04.10.2020

Sýningin er opin frá og með 22. ágúst

Verið hjartanlega velkomin á yfirlitssýningu Ástu Ólafsdóttur í Nýlistasafninu, Marshallhúsinu. Sýningin er opið frá og með laugardeginum 22. ágúst og verður opin á hefðbundnum opnunartímum safnsins, miðvikudaga til sunnudaga frá klukkan 12–18.

Sýningin Hjartsláttur leiðir saman verk frá rúmlega fjörutíu ára myndlistarferli Ástu, frá námsárum hennar til dagsins í dag. Öll endurspegla þau á sinn hátt óþreytandi eltingarleik Ástu við fjölbreyttar víddir veruleikans. Þá einkum það sem við getum ekki snert og eigum til að líta framhjá í dagsins önn og amstri. Þögnina, tómið, hljóð og tilfinningar, en líka vald, jafnvægi og aðra menningarheima. Aflgjafa sem skilja eftir sig ummerki. Þá verður augljós sú staðreynd að manneskjan er hluti af stærri heild og náttúran er aldrei langt undan. Hún er stöðug og síbreytileg í senn, traustur ferðafélagi. Eins og listin.

Ásta Ólafsdóttir er fædd í Reykjavík 1948. Hún stundaði myndlistarnám í Nýlistadeild við Myndlista- og handíðaskóla Íslands og Jan Van Eyck Akademíuna í Hollandi. Listferill Ástu spannar rúmlega 40 ár af sýningarhaldi og Ásta er ein af virkustu myndlistarmönnum sinnar kynslóðar. Hún er tilraunagjörn í listsköpun sinni, bæði hvað varðar efnisval og myndmál. Hún hefur unnið í fjölbreytta miðla, þar á meðal vídeó og hljóð ásamt því að hún hefur verið virk í textagerð og bókaútgáfu. Ásta hefur miðlað þekkingu sinni með kennslu á öllum kennslustigum og verk hennar og ferill hafa haldist þétt í hendur við vaxandi umsvif kvenna í íslensku myndlistarlífi.

Það er sérstaklega ánægjulegt að yfirlitssýning Ástu skuli eiga sér stað og stund í Nýlistasafninu, safninu sem hún tók þátt í að stofna á sínum tíma. Allar götur síðan hefur hún tekið virkan þátt í starfssemi safnsins. Hér hélt hún sína fyrstu einkasýningu árið 1986 og í dag er hún heiðursfélagi í Nýló.

Við hlökkum til að taka á móti ykkur!

Verið velkomin á safneignarsýningu sumarsins í Nýlistasafninu, Ný aðföng. Á sýningunni má sjá úrval verka sem gefin hafa verið í safneign síðustu þrjú ár. Elstu verkin á sýningunni eru frá sjöunda áratug síðustu aldar og þau nýjustu eru aðeins nokkurra ára gömul. Á sýningunni má finna verk unnin í ýmsa miðla, þar á meðal textílverk, skúlptúra, ljósmyndir og innsetningar.

Sýningin stendur frá 14. júlí til 9. ágúst. Það verður engin hefðbundin opnun en listamannaspjall verður haldið þann 30. júlí og verður það kynnt betur síðar.

Listamennirnir sem eiga verk á sýningunni eru:
Bjarki Bragason
Claudia Hausfeld
G.Erla
Hildur Hákonardóttir
Jóna Hlíf Halldórsdóttir
Kolbrún Ýr Einarsdóttir
Ragnheiður Ragnarsdóttir
Rúna Þorkelsdóttir

EINANGRA FAGNA ÚTFÆRA

01.05–03.05 2020

Vefsýningaropnun: 1. maí 2020 kl. 18:00

Við kynnum með stolti vefsýninguna EINANGRA FAGNA ÚTFÆRA sem opnar á morgun, föstudaginn 1. maí kl. 18:00 á sarpur.is. Sýningin spannar verk úr stafrænum safnkosti Nýlistasafnsins og er stýrt af nemendum í myndlist við Listaháskóla Íslands og Listfræði við Háskóla Íslands. Við opnun verður hlekk á sýninguna deilt á facebook viðburði sýningarinnar, ásamt sýningarskrá með frekari upplýsingar um verkin, áhugaverð viðhorf listamannana á umfjöllunarefni sýningarinnar og því sem er að gerast í samfélaginu. Í tilefni af opnuninni verður einnig birt glænýtt vídeóverk eftir Silfrúnu Unu Guðlaugsdóttur á viðburðinum og á instagram síðu Nýlistasafnsins.

Listamenn:
Auður Lóa Guðnadóttir & Starkaður Sigurðarson
Geoffrey Hendricks
G.Erla, Karlotta Blöndal
Ragnheiður Káradóttir
Silfrún Una Guðlaugsdóttir
Steinunn Gunnlaugsdóttir
Vilda Kvist

Sýningarstjórar:
Brák Jónsdóttir
Helga Jóakimsdóttir
Katrín Björg Gunnarsdóttir
Klara Gradtman
Odda Júlía Snorradóttir
Paula Zvane
Sara Björk Hauksdóttir

Við lifum á tímum sýndarveruleika og einangrunar, þar sem kórónaveiran hefur stemmt innileika og gleði mannlegrar samveru í útrýmingarhættu og komið okkur í undarlega tilvistarkreppu. Samvera er ekki aðeins litin hornauga, heldur talin beinlínis hættuleg og hefur víða verið bönnuð. Í kjölfarið höfum við þurft að beita útsjónarsemi við að finna upp nýjar leiðir til að fagna félagslegum samkomum í gegnum Internetið sem gefur okkur færi á að líta innávið og sjá fögnuð og hátíðir í nýju ljósi.

Eftirleikur þeirra nýju lifnaðarhátta sem við höfum tileinkað okkur mun ef til vill birtast sem hungur eftir áþreifanlegum stað og stund, eftir þeirri líkamlegu samveru við aðra sem ekki getur verið afrituð á netinu. Við munum því fagna þegar farsóttin er yfirstaðin eins og við höfum fagnað góðum fréttum og gleðilegum viðburðum í gegnum tíðina. Við getum velt því fyrir okkur hvort að líkamlegt samband okkar við hvert annað sé breytt til frambúðar og hvað við höfum lært af þessari reynslu. Ef til vill gerum við okkur loks grein fyrir því að við þurfum ekki að vera með puttann stanslaust á púlsinum, að hvert sem við snúum okkur í heiminum blasir við okkur ofur-örvun og óyfirstíganleg innbyrðis tengsl.

EINANGRA FAGNA ÚTFÆRA fæst við óhefðbundnar leiðir til hátíðarhalda. Verkin ögra hugmyndum okkar um hátíðarhöld, hversu samtvinnuð þau eru félagslegu frelsi, og hvernig við heiðrum og tengjumst umhverfi okkar. Með nýrri sýn á heiminn og samveru, getum við skilið samruna manneskjunnar við hinn stafræna heim og vonandi öðlast betri skilning á tilgangi og tilveru okkar og þörf til að fagna því sem hingað til hefur ekki verið fagnað.

Mynd:
Vilda Kvist, This Moment Is So Much Bigger Than Me, 2013