Verið velkomin á sýninguna HAPPY PEOPLE – Reykstofu sem býður uppá úrval listaverka sem hafa verið sköpuð fyrir þig til að eiga við og njóta.

Dularfullum skúlptúrum hefur verið komið fyrir í framúrstefnulegum vatnspípum og bíða þess að þú komir og reykir þá. Neytir þeirra og andir þeim að þér með ávaxtakeim. Reykingasermóníurnar eru tilraunir til að njóta listar á nýjan hátt.

Í hverri viku verður verkum í pípunum skipt út og með því myndast flæðandi hringrás í rýminu. Á hverri reykingasermóníu verður dagskrá lifandi gjörninga og viðburða.

Við opnun sýningarinnar býðst þér að reykja verk eftir Hrafnhildi Helgadóttur, Mehraneh Atashi, Eggert Pétursson, Loidys Carnero og Hrein Friðfinnsson.

Á fyrstu reykingasermóníunni verður einnig fluttur þokukenndur gjörningur eftir Darra Lorenzen.