Fyrir sýningu sína í Núllinu hefur Kristín unnið innsetningu sem teygir sig frá gólfi, um veggi – upp í loft. Í verkum sínum hefur Kristín þróað ákveðið myndmál sem á uppruna sinn í almannarými og á afmörkuðum svæðum, eins og flugvöllum, akbrautum og bílastæðum; þar sem línu- og litamerkingar eru notaðar til að skilgreina ýmis konar kerfi og regluverk. Kristín spilar saman þessum línulaga stofnanamerkingum við tákn fengin úr heimi íþrótta og leikja.

Þessu myndmáli er svo gefið nýtt hlutverk þegar það er fært inn í samhengi sýningastaðarins. Teikningar sem gerðar eru í vinnustofunni eru yfirfærðar í rýmið og eru hér aðlagaðar að aðstæðum jarðhússins, hlutföllum þess og einkennum.