Lokahelgi sýninga og listamannaspjall með Bjarka Bragasyni
Síðasta sýningahelgin
Listamannaspjall með Bjarka Bragasyni
03.03.19 kl. 15:00
Verið hjartanlega velkomin á listamannaspjall með Bjarka Bragasyni undir leiðsögn Sunnu Ástþórsdóttur sunnudaginn 3. mars kl. 15:00. Aðgangur er ókeypis og allir eru velkomnir. Spjallið fer fram á lokadegi sýningar hans ÞRJÚÞÚSUND OG NÍU ÁR en þessa sömu helgi lýkur einnig sýningu Kolbeins Huga, Cryptopia One: A Beginning Is A Very Delicate Time. Safnið er opið laugardag og sunnudag frá 12-18.
Einkasýningar Kolbeins Huga og Bjarka Bragasonar eru báðar staðsettar í sýningarsal Nýlistasafnsins í Marshallhúsinu og bergmála sín á milli. Báðar rannsaka þær samband okkar við umhverfið, fólk og hluti í fortíð, nútíð og framtíð en listamennirnir nálgast viðfangsefnið út frá ólíkum sjónarhornum og aðferðum.
Með sýningunni ÞRJÚÞÚSUND OG NÍU ÁR glímir Bjarki Bragason við áhrif nærumhverfisins á hann sjálfan, og aðra, á nánast umhverfisfræðilegan hátt meðan Kolbeinn Hugi nýtir sér framúrstefnu og vísindaskáldskap til að fletta dulunni af mögulegri framtíð með Cryptopia One: A Beginning Is A Very Delicate Time.
Þannig hvíslast verk beggja listamanna á um mismunandi tíma og leiðir til að tengja við og reyna að skilja þann heim sem umlykur okkur.
Í gegnum tíðina hafa leiðir þeirra Kolbeins Huga og Bjarka Bragasonar títt legið saman en þetta er í fyrsta sinn sem þeir opna samhliða sýningar í sama rýminu.
(Mynd: Vigfús Birgisson)
