Vorverk / Listamannaspjall og gjörningur
Nýlistasafnið býður ykkur hjartanlega velkomin á leiðsögn og spjall um sýninguna Vorverk / Spring Task eftir Kristínu Helgu Káradóttur, laugardaginn 30. maí klukkan 15:00. Listakonan verður á staðnum. Kaffi/kakó og pönnukökur. Allir velkomnir.
Sýningin Vorverk er sú síðasta í sýningaröðinni Hringhiminn og er hluti af dagskrá Listahátíðar í Reykjavík 2015. Sýningin stendur til 13. júní.
Með draumkenndum raunsæistón fagnar listakonan komu vorsins með tilheyrandi togstreitu hið innra og hið ytra. Veturinn hefur losað tök sín og umbreyting árstíðanna birtist í hráum sýningarsal í manngerðu umhverfi fjarri náttúrunni. Jarðveg sýningarinnar skapaði listakonan út frá samfélaginu í kringum Nýlistasafnið í Fellahverfi en jafnframt út frá veruleika listamannsins; einyrkjanum í sýningarsalnum. Á mörkum listforma mætast þessir tveir pólar. Vorverk fela í sér hreinsun andans ekki síður en umhverfisins og stuðla að grunni fyrir vöxt og einingu lífs.
Úr sýningarskrá:
Hlutskipti einyrkjans
er að tala við sjálfan sig
í þögninni
í garðinum
í stílabókinni
í sýningarsalnum.
En þegar verkin tala máli einyrkjans
fæðist alltaf eitthvað nýtt
nýtt upphaf
samtal við heiminn.
I’m a female artist. Móðurmál mitt er íslenska.
Ég er móðir og ég er einstæð móðir.
Leita að konum af erlendum uppruna til þess að taka þátt í gjörningi
með von um samstarf.
Kristín Helga Káradóttir nam myndlist við Listaháskóla Íslands, lauk þaðan BA gráðu árið 2004 og MA gráðu árið 2014. Á námsárunum fór hún í skiptinám í Listakademíuna í Kaupmannahöfn og á Fjóni. Kristín Helga á að baki sýningarhald og vinnustofudvalir innan- sem utanlands. Verk hennar hafa ferðast víða um heiminn á sýningar og myndbandahátíðir.
Líkaminn og leikræn tjáning er öflugur miðill í verkum Kristínar Helgu. Verkin spanna myndbandsverk, gjörninga, ljósmyndir og innsetningar en mest vinnur Kristín Helga á mörkum þessara listmiðla. Listakonan notar sjálfa sig í gjörningaverk sín en upp á síðkastið hefur hún fengið til liðs við sig aðra flytjendur. Verk Kristínar Helgu eru tilvistarlegs eðlis, miðla ástandi og líðan manneskjunnar í tilteknu umhverfi en jafnframt hefur listkonan brugðið á leik með það að markmiði að setja áhorfendur í spurn eða kalla fram viðbrögð þeirra. MA-útskriftarverk Kristínar Helgu var langvarandi gjörningur í Gerðarsafni í Kópavogi er nefndist Andvarp.
Ljósmynd: Valgarð Gíslason, Listahátíð í Reykjavík 2015.