Eygló Harðardóttir er myndlistarmaður ársins 2019!
Eygló Harðardóttir var valin myndlistarmaður ársins fyrir sýningu sína í Nýlistasafninu, Annað Rými, á Íslensku Myndlistarverðlaununum sem haldin voru við hátíðlega athöfn í gær, fimmtudaginn 21. febrúar. Leifur Ýmir Eyjólfsson hlaut hvatningarverðlaun ársins fyrir sýninguna Handrit í Listasafni Reykjavíkur.
Nýlistasafnið óskar báðum listamönnum innilega til hamingju og þakkar um leið Eygló kærlega fyrir samstarfið á liðnu ári! Við erum afskaplega stolt af sýningunni Annað Rými en á Listasafni Reykjavíkur má um þessar mundir líta augum verkið Gler Skúlptúr sem sett hefur verið upp í Hafnarhúsinu af tilefni verðlaunanna. Verkið eignaðist stað í safneign Listasafns Reykjavíkur meðan á sýningunni stóð í Nýló.
Í umsögn dómnefndar segir að sýningin Annað rými hafi borið titil sinn með réttu. „Með verkum sem í senn voru fínleg og stórkarlaleg, unnin í viðkvæman efnivið, opnaði listakonan fyrir gáttir sem áhorfandinn gat smeygt sér inn fyrir og aukið skynjun sína og næmi á kostnað hinnar vanabundnu rökhyggju.“ Segir meðal annars. Dómefnd skipaði Aðalsteinn Ingólfsson, Jóhann Ludwig Torfason, Sigurður Guðjónsson, Margrét Kristín Sigurðardóttir og Hanna Styrmisdóttir.
Mynd með frétt: Vigfús Birgisson
Eygló Harðardóttir tilnefnd til íslensku myndlistarverðlaunanna fyrir sýninguna Annað Rými í Nýlistasafninu
Eygló Harðardóttir er tilnefnd til íslensku myndlistarverðlaunanna fyrir sýninguna „Annað Rými“ sem haldin var í Nýlistasafninu í september og október á síðasta ári.
Í umsögn segir meðal annars: „Með verkum sem í senn voru fínleg og stórkarlaleg, unnin í viðkvæman efnivið, opnaði listakonan fyrir gáttir sem áhorfandinn gat smeygt sér inn fyrir og aukið skynjun sína og næmi á kostnað hinnar vanabundnu rökhyggju.“
Við óskum Eygló Harðardóttur innilega til hamingju með tilnefninguna! Við erum stolt af okkar gjöfula og lærdómsríka samstarfi með Eygló að sýningunni Annað Rými.
Safnanótt í Nýló 2019: Leiðsögn um ÞJÚÞÚSUND OG NÍU ÁR
Safnanótt í Nýlistasafninu 2019
08.02.2019 kl. 20:00
Berglind Jóna Hlynsdóttir leiðir gesti um sýningu Bjarka Bragasonar, ÞRJÚÞÚSUND OG NÍU ÁR
Velkomin á safnanótt í Nýlistasafninu föstudaginn 8. febrúar klukkan 20:00. Berglind Jóna Hlynsdóttir verður með leiðsögn um yfirstandandi sýningu Bjarka Bragasonar, ÞRJÚÞÚSUND OG NÍU ÁR. Berglind hefur fylgst með ferlinu síðan vinna við sýninguna hófst en hún mun veita innsýn í verkin og hugarheim listamannsins. Aðgangur er ókeypis og allir eru velkomnir.
Í Nýlistasafninu standa nú yfir tvær sýningar, sýning Bjarka Bragasonar ÞRJÚÞÚSUND OG NÍU ÁR og sýning Kolbeins Huga Cryptopia One: A Beginning Is A Very Delicate Time. Báðar sýningarnar beina sjónum okkar að náttúrunni og nærumhverfinu og rannsaka samband mannsins við umhverfi sitt, fólk og hluti í fortíð og nútíð. Listamennirnir beita þó afar ólíkum aðferðum og nálgast viðfangsefnið út frá mismunandi sjónarhornum og aðferðum. Báðar sýningar verða opnar í tilefni kvöldsins en safnið lokar klukkan 22:00.