Ljósabasar 2020
26. Nóvember – 20. Desember 2020

www.ljosabasar.gamla.nylo.is
Opnar á netinu fimmtudaginn langa, 26. nóvember 2020

Opið geymslu- og örsýningarrými í Nýlistasafninu, Marshallhúsinu

Verið hjartanlega velkomin á Ljósabasar Nýlistasafnsins 2020! 

Ljúkum þessu ólgandi ári saman með hvelli! Ljósabasar 2020 fer fram dagana 26.nóvember til 20. desember. Að þessu sinni mun basarinn eiga sér vettvang á netinu, á síðunni ljosabasar.gamla.nylo.is sem verður gerð opinber á fimmtudeginum langa 26. nóvember kl. 17:00. Þar verður hægt að skoða verkin, kynna sér listamennina sem taka þátt í basarnum og kaupa samtímalist eftir yfir 40 myndlistarmenn, sem öll eru félagar safnsins. Við bjóðum einnig gesti velkomna í Nýlistasafnið, Marshallhúsinu, þar á Ljósabasarinn sér annan samastað með opinni geymslu og örsýningu í safnbúðinni. Þar má líta verk Ljósabasars eigin augum á hefðbundnum opnunartímum safnsins.

Verkin eru jafn fjölbreytt og þau eru mörg en þau tengjast öll ljósinu í orðsins víðasta skilningi: Ljós gerir heiminn sýnilegan og leiðir okkur þannig áfram á ýmsa áfangastaði, rótgróna og raunverulega, háfleyga og ljóðræna, uppspunna og afbakaða. Eftir þetta ár ójafnvægis og umróta er gott að láta listina lýsa upp myrkasta tíma ársins, og jafnvel skreyta eða teygja svolítið á veruleikanum.

Ljósabasar Nýló er fjáröflunarviðburður til stuðnings Nýlistasafninu. Nýlistasafnið, eða Nýló eins og safnið er nefnt í daglegu tali, er listamannarekið safn og sýningarrými. Markmið Nýló er að varðveita og sýna samtímalist og vera vettvangur fyrir tilraunir og alþjóðlega umræðu um myndlist. Nýló hefur verið einn helsti vettvangur fyrir samtímalist á Íslandi og á einstakt safn verka eftir íslenska og alþjóðlega listamenn frá sjötta áratugnum til dagsins í dag.

Áfram Nýló, tilraunagleðin og listin!

Opið fyrir umsóknir: Vinnustofudvöl í Clermont-Ferrand  í Frakklandi í apríl 2021  Frestur til 30. október 2020 Kæru fulltrúar, Frestur til að sækja um í vinnustofudvöl í Clermont Ferrand í Frakklandi hefur verið framlengdur um viku. Vinnustofudvölin er afrakstur samstarfs milli Nýló og Artiste en residence í Clermont Ferrand, með góðum stuðningi frá Franska sendiráðinu á Íslandi og Alliance Francaise í Reykjavík. Fulltrúar Nýló sem hafa borgað ársgjald 2020 er frjálst að sækja um vinnustofudvöl í apríl 2021 í Artiste en Residence í Clermont Ferrand (http://www.artistesenresidence.fr), inniflalið er gistiaðstaða, aðgangur að vinnustofu og 1.000€ styrk fyrir uppihaldi. Listamaðurinn verður að koma sér á staðinn á eign vegum en Nýló aðstoðar við að sækja um ferðastyrki ef þess er þörf. Hér er á ferðinni einstakt tækifæri og við hvetjum sem flest ykkar til að sækja um.

Dvölin er eins konar „skipti-prógram“, Nýló sendir fulltrúa til Frakklands í mánuð í senn, og á móti tökum við á móti listamanni frá Frakklandi í mánaðardvöl hjá SÍM. Í september í ár dvaldi  franskur listamaður, Naomi Maury, í vinnustofu SÍM á Seljavegi. Naomi kom til Íslands í byrjun mánaðarins og byrjaði  eftir sóttkví að kynnast íslenskri myndlistarsenu, hitti listamenn, sýningarstjóra og vann að eigin verkum. Hún fór  aftur til Frakklands í lok september. 

Nánar um umsóknarferlið:

Umsóknin á að vera skrifuð á ensku. (Ath að ekki er nauðsynlegt að vera frönskumælandi, til sækja um eða dvelja í resídensíunni.)  Með umsókninni skal fylgja ferilskrá ásamt stuttri yfirlýsingu listamanns (e. artist statement, hámark 500 orð). 

Að auki skulu fylgja með tíu til 20 myndir af fyrri verkum. Fyrir tímatengd verk, myndbands eða hljóðverk skal setja inn hlekk sem leiðir beint á Vimeo, Youtube eða álíka veitur.

Vinsamlegast sendið ekki myndbönd eða hljóðverk beint í tölvupósti, aðeins hlekki. Senda skal umsóknir og allt efni sem þeim viðkemur, utan tímatengdra verka, í einu samhangandi PDF skjali. Skjölin mega ekki vera stærri en 10 MB.

Umsóknir sem ekki fara eftir umbeðnum kröfum og leiðbeiningum eða í vantar einhver gögn verða ekki teknar til greina. Inntökunefnd á vegum Artiste en Residence í Clermont-Ferrand velur úr umsóknum.

Umsóknir berist fyrir miðnætti, 30. október 2020 á netfangið nylo(hjá)gamla.nylo.is merktar „Clermont-Ferrand_2021“. Ekki verður tekið við útprentuðum umsóknum. Fyrirspurnir berist á sama netfang. Einnig er velkomið að senda fyrirspurnir á Bruno Silva hjá Artites En Residence: bruno.silva(hjá)artistesenresidence.fr

HJARTSLÁTTUR

yfirlitssýning Ástu Ólafsdóttur

Leiðsögn listamanns 

13. september kl. 14

Ásta Ólafsdóttur leiðir gesti um yfirlitssýningu sína í Nýlistasafninu sunnudaginn 13. september kl. 14. Það er ókeypis aðgangur og tekið vel á móti öllum. Leiðsögnin verður á íslensku. 

Sýningin Hjartsláttur leiðir saman verk frá rúmlega fjörutíu ára myndlistarferli Ástu, frá námsárum hennar til dagsins í dag. Öll endurspegla þau á sinn hátt óþreytandi eltingarleik Ástu við fjölbreyttar víddir veruleikans. Þá einkum það sem við getum ekki snert og eigum til að líta framhjá í dagsins önn og amstri. Þögnina, tómið, hljóð og tilfinningar, en líka vald, jafnvægi og aðra menningarheima. Aflgjafa sem skilja eftir sig ummerki. Þá verður augljós sú staðreynd að manneskjan er hluti af stærri heild og náttúran er aldrei langt undan. Hún er stöðug og síbreytileg í senn, traustur ferðafélagi. Eins og listin. 

Ljósmynd með frétt: Vigfús Birgisson

Opið fyrir umsóknir um haustsýningu Nýlistasafnsins 2021

Open call
دعوة†مفتوحة
Otwarte zaproszenie

Undanfarin tvö ár hefur Nýlistasafnið leitað til félaga safnsins og kallað eftir tillögum að haustsýningu í safninu. Markmiðið með því ákalli hefur verið að víkka út sjóndeildarhring stjórnar og kynna fjölbreytileika íslenskrar myndlistarsenu fyrir almenningi. Í kjölfar þeirrar ólgu sem hófst með sterku og þörfu ákalli svartra og blandaðra minnihlutahópa í Bandaríkjunum sem nú hefur ýtt við flestum kimum heimsins hefur runnið upp fyrir stjórn safnsins að við höfum ekki náð fyllilega að endurspegla þá fjölbreyttu grósku sem einkennir listir og mannlíf hérlendis. Sem fyrsta skref í tilraun til að ýta undir fjölbreytni og þátttöku allra hefur stjórn Nýló ákveðið að leita víðar í þessu árlega ákalli um sýningartillögur:

Nú er opið fyrir umsóknir um haustsýningu Nýlistasafnsins fyrir árið 2021, og þessu ákalli er sérstaklega beint að einstaklingum og hópum hvers raddir hafa hingað til ekki fengið nægan hljómgrunn. Við hvetjum fólk af ólíkum uppruna og með ólíkan bakgrunn, hvort sem viðkomandi er aðili að Nýló eða ekki, að senda inn tillögu. Við leitum sérstaklega til hinsegin samfélagsins,íslendinga með erlendan uppruna og blandaða íslendinga, aðfluttra íslendinga og annarra sem finna sig á jaðrinum að deila með okkur sínum sjónarhornum. Til þess að tryggja fjölbreytileika og vinna gegn dulinni hlutdrægni hefur stjórn ákveðið að bjóða fleirum að borði í valnefnd.

Nýlistasafnið á að vera afl breytinga, bæði vegna stöðu Nýló sem viðurkennt safn og opinber stofnun, og í ljósi sögu safnsins. Megintilgangurinn með stofnun Nýlistasafnsins árið 1978 var fyrst og fremst að opna augu listheimsins og almennings fyrir nýjungum og breyttum viðfangsefnum myndlistarmanna í samtímanum og er eitt af markmiðum safnsins að þjóna sem vettvangur gagnrýnnar hugsunar og umræðu.

Með þessu opna umsóknarferli viljum við berjast gegn hvers slags mismunun sem á sér stað í samfélagi okkar í dag, kynþáttamisrétti og jaðarsetningu minnihlutahópa.

Við viljum beita okkur fyrir virkri þátttöku allra, berjast gegn þöggun og „við og hinir“ hugsunarhætti, bjóða frásagnir og viðfangsefni sem hingað til hafa verið hliðarsettar fremst á sögusviðið og gæta þess að við festumst ekki í orðræðu sem einfaldar sýn okkar á samfélagið. Með þessu ákalli viljum við stuðla að fjölradda, litskrúðugri og opinni listasenu.

Praktísk atriði

Bæði einka- og samsýningar koma til greina.

Með umsókninni skal fylgja ferilskrá ásamt stuttri lýsingu á inntaki og efnistökum sem viðkomandi hyggst vinna út frá á fyrirhugaðri sýningu (hámark 250 orð). Tillagan skal einnig innihalda upplýsingar um tæknileg atriði og uppsetningu. Að auki skulu fylgja með fimm myndir af fyrri verkum. Fyrir tímatengd verk, myndbands eða hljóðverk skal setja inn hlekk sem leiðir beint á Vimeo, Youtube eða álíka veitur. Vinsamlegast sendið ekki myndbönd eða hljóðverk beint í tölvupósti; aðeins hlekki. Senda skal umsóknir og allt efni sem þeim viðkemur, utan tímatengdra verka, í einu samhangandi PDF skjali. Skjölin mega ekki vera stærri en 10 MB.

Umsóknir sem ekki fara eftir umbeðnum kröfum og leiðbeiningum eða í vantar einhver gögn verða ekki teknar til greina.

Umsóknir berist fyrir miðnætti, 04. Október 2020 á netfangið nylo@gamla.nylo.is merktar „umsókn_2021“. Ekki verður tekið við útprentuðum umsóknum. Fyrirspurnir berist á sama netfang.

Í hnotskurn:

Umsóknarfresti lýkur: 04.10.20, kl 23:59

Svar við umsókn berst ekki seinna en tveimur vikum síðar.

Sýningartímabil: Haust 2021 (ágúst-september)

Smellið til að hlaða niður tilkynningum á ensku, pólsku og arabísku.

Fimmtudagurinn langi, 27. ágúst!

Opið til 22 og enginn aðgangseyrir á fjölda sýningarstaði í miðborginni

Á fimmtudaginn, 27. ágúst er langur fimmtudagur! Þá bjóða fjöldi safna og sýningarstaða í miðbænum upp á lengdan opnunartíma. Þá er tilvalið að bregða sér í snertilausan göngutúr, skoða fjölbreyttar listasýningar og heimsækja listamannarekin rými, gallerí og söfn. Enginn aðgangseyrir. 

Fimmtudagurinn langi 27. ágúst litast af fjölbreyttum, líflegum og snertilausum viðburðum. Þá stendur Listasafn Reykjavíkur fyrir leiðsögn um sýningu Gilbert & George í hafnarhúsinu, og um sýninguna Allt sem sýnist – Raunveruleiki á striga, á Kjarvalsstöðum. Vegna fjöldatakmarkana er skráning í báðar leiðsagnir nauðsynleg, og fer fram í gegnum heimasíðu safnsins. Núllið Gallerý opnar nýja sýningu Aniku L. Baldursdóttur, og í Gallerí Port verður lokahóf fyrir sýningu Ella Egilssonar, Efnisþættir. Samband Íslenskra Myndlistarmanna opnar sýningu á verkum þeirra listamanna sem hafa dvalið og starfað í gestavinnustofum SÍM í ágúst og Listasafn Íslands endurtekur leikinn frá seinasta langa fimmtudegi og leiðir áhugasama í listagöngu um Skólavörðuholtið. Í gluggagalleríinu Wind & Weather Window Gallery má skoða sýningu Freyju Eilíf, Millihlustargátt. Nóg verður um að vera í Marshallhúsinu: Í Kling og Bang verður performatíft listamannaspjall og leiðsögn með Anaira Omann, í Nýlistasafninu fylgja þeir Hallgrímur Helgason og Anton Helgi Jónsson gestum í ljóðaleiðsögn um sýningarsalinn og Studio Ólafs Elíassonar verður opið. 

Verið hjartanlega velkomin! 

Verið hjartanlega velkomin á yfirlitssýningu Ástu Ólafsdóttur í Nýlistasafninu, Marshallhúsinu. Sýningin er opið frá og með laugardeginum 22. ágúst og verður opin á hefðbundnum opnunartímum safnsins, miðvikudaga til sunnudaga frá klukkan 12–18. 
 

Sýningin Hjartsláttur leiðir saman verk frá rúmlega fjörutíu ára myndlistarferli Ástu, frá námsárum hennar til dagsins í dag. Öll endurspegla þau á sinn hátt óþreytandi eltingarleik Ástu við fjölbreyttar víddir veruleikans. Þá einkum það sem við getum ekki snert og eigum til að líta framhjá í dagsins önn og amstri. Þögnina, tómið, hljóð og tilfinningar, en líka vald, jafnvægi og aðra menningarheima. Aflgjafa sem skilja eftir sig ummerki. Þá verður augljós sú staðreynd að manneskjan er hluti af stærri heild og náttúran er aldrei langt undan. Hún er stöðug og síbreytileg í senn, traustur ferðafélagi. Eins og listin. 
 

Ásta Ólafsdóttir er fædd í Reykjavík 1948. Hún stundaði myndlistarnám í Nýlistadeild við Myndlista- og handíðaskóla Íslands og Jan Van Eyck Akademíuna í Hollandi. Listferill Ástu spannar rúmlega 40 ár af sýningarhaldi og  Ásta er ein af virkustu myndlistarmönnum sinnar kynslóðar. Hún er tilraunagjörn í listsköpun sinni, bæði hvað varðar efnisval og myndmál. Hún hefur unnið í fjölbreytta miðla, þar á meðal vídeó og hljóð ásamt því að hún hefur verið virk í textagerð og bókaútgáfu. Ásta hefur miðlað þekkingu sinni með kennslu á öllum kennslustigum og verk hennar og ferill hafa haldist þétt í hendur við vaxandi umsvif kvenna í íslensku myndlistarlífi. 

Það er sérstaklega ánægjulegt að yfirlitssýning Ástu skuli eiga sér stað og stund í Nýlistasafninu, safninu sem hún tók þátt í að stofna á sínum tíma. Allar götur síðan hefur hún tekið virkan þátt í starfssemi safnsins. Hér hélt hún sína fyrstu einkasýningu árið 1986 og í dag er hún heiðursfélagi í Nýló. 

Við hlökkum til að taka á móti ykkur! 

Fimmtudagurinn langi, 30. Júlí!  

Opið til 22 og enginn aðgangseyrir hjá fjölda sýningarstaða í miðborginni

Í sumar býður fjöldi safna og sýningarstaða í miðbænum upp á lengdan opnunartíma síðasta fimmtudagskvöld í júní, júlí og ágúst. Þá er tilvalið að bregða sér í göngutúr og skoða fjölbreyttar listasýningar, kíkja við á vinnustofum listamanna, heimsækja listamannarekin rými, gallerí og söfn – og upplifa líflega myndlistarsenu miðborgarinnar! Enginn aðgangseyrir og boðið verður upp á ýmsar óvæntar uppákomur.  

Dagskráin 30. júlí er fjölbreytt og lífleg. Þá verður opið til 22:00 á fjórtán sýningarstöðum í miðbænum. Vert er að taka fram að í Hverfisgallerí er yfirstandandi sýning, Houndshills, Houndshollows eftir Guðmund Thoroddsen opin til 21:00 og kvöldið í Kling & Bang í Marshallhúsinu verður líka með ólíku sniði. Þar opnar kl. 20:30 með gjörningi Arnar Alexanders Ámundasonar. Á vinnustofu Shoplifter (Hrafnhildar Arnardóttur) verður hægt að upplifa verk hennar Chromo Sapiens í sýndarveruleika, og hjá Sambandi Íslenskra myndlistarmanna verður opnun á samsýningu þeirra listamanna sem hafa dvalið og starfað í gestavinnustofum SÍM í júlí. 

Núllið gallerý opnar einnig nýja sýningu eftir Sölku Rósinkranz og Tótu Kolbeinsdóttur og Listasafn Íslands býður upp á listgöngu um sunnanvert Skólavörðuholt. Í Nýlistasafninu verður útgáfuhóf í tilefni af nýju bókverki eftir Fritz Hendrik IV og óformlegt listamannaspjall við nokkra af þeim listamönnum sem eiga verk á sýningunni Ný aðföng. Í Listasafni Reykjavíkur verður pop-up bar í Hafnarhúsinu og happy hour tilboð á Klambrar Bistro, Kjarvalstöðum. Í Gallerí Port verður yfirstandandi sýning listhópsins Kaktus opin, í i8 má sjá sýningu á verkum Ólafs Elíassonar, Handan mannlegs tíma. Í gluggagalleríinu Wind & Weather er sýningin Millihlustargátt eftir Freyju Eilíf og í Stúdíó Ólafs Elíassonar í Marshallhúsinu eru verk eftir listamanninn til sýnis. Í listamannarekna sýningarrýminu Harbinger standa listamennirnir Anna Hrund Másdóttir, Ragnheiður Káradóttir og Steinunn Marta Önnudóttir fyrir opinni tilraunastofu. 

Dagskrána í heild sinni er að finna á facebook viðburði fimmtudagsins langa. 
 

Verið hjartanlega velkomin! 

Erling Klingenberg

Lokahóf og listamannaspjall
 

Laugardaginn 27. júní kl. 16:00–19:00

Listamannaspjall kl. 16:00–17:00

Yfirlitssýning Erlings T. V. Klingenberg í Nýlistasafninu og Kling & Bang lýkur um helgina. Af því tilefni efnum við til lokahófs með listamannaspjalli á laugardaginn, 27. júní milli kl. 16:00–19:00 í Marshallhúsinu. Fyrsta klukkutímann munu Erling sjálfur og sýningarstjóri sýningarinnar, Daníel Björnsson, spjalla um sýninguna og taka við spurningum. Léttar veigar verða í boði.

Verið öll hjartanlega velkomin! 

Mynd með frétt: Erling T.V. Klingenberg, Asslick 25 cents, 1999. Ljósmynd: Vigfús Birgisson

Síðasti fimmtudagur í hverjum sumarmánuði er fimmtudagurinn langi! 
 

Í sumar taka fjöldi safna og sýningarstaða í miðbænum sig saman og bjóða upp á á lengdan opnunartíma síðasta fimmtudagskvöld í júní, júlí og ágúst. Þar á meðal er Marshallhúsið og Nýlistasafnið. Þá er tilvalið að bregða sér af bæ og skoða fjölbreyttar listasýningar, kíkja við á vinnustofum listamanna, heimsækja listamannarekin rými, gallerí og söfn – og upplifa líflega myndlistarsenu miðborgarinnar! Enginn aðgangseyrir og boðið verður upp á ýmsar óvæntar uppákomur. Að auki verða sérstök tilboð á ýmsum kaffi- og veitingahúsum þessi fimmtudagskvöld. Dagskrána er að finna hér að neðan. Í Nýlistasafninu og Kling & Bang verður yfirlitssýning Erlings T. V. Klingenberg opin, en henni lýkur núna um helgina. Í Studio Ólafur Elíasson eru til sýnis verk eftir Ólaf Elíasson. Verið öll velkomin!